Арсеналын шилдэг 12 найруулагч

Их буучид Мэсүт Өзилийг эгнээндээ нэгтгэхэд ихэнх хүмүүс дэлхийн хамгийн шилдэг найруулагч нарын нэгийг авчихлаа хэмээн шагшиж байсан. Одоогоор мань эр энэ бодлыг батласан тоглолт үзүүлж байна. Энэ удаагийн орчуулгаар найруулагчийн байрлалд Арсеналын төлөө гялалзаж асан 12 шилдэг тоглогчийн тухай бичсэн Брайн Гланвиллийн нийтлэлийг хүргэж байна.

Чарли Бушан (Charlie Buchan 1925-28)
120 тоглолт, 56 гоол

Чарли Бушаныг Арсенал 2000 паундаар авсан бөгөөд 1925 онд Сандерландаас ирсэн эхний улиралдаа тус бүр нь 100 паундын өртөгтэй 20 гоол хийжээ. 15 жилийн өмнө 11 шиллингийн зардал гаргахаас татгалзаагүй бол огт мөнгө төлөхгүй өөрийн болгох боломж байсан юм. Пламстид дэх Вүүлвич Арсеналын талбайгаас холгүйхэн төрсөн Бушан 1909 онд сонирхогчийн журмаар клубт анх элсэж байв. Цалингийн маргаанаас болж Нортфлит рүү явсан мань эр Лейтоноор дамжин 1911 онд Сандерландад нэгдлээ. Оддын цуглуулга болсон клубт тэрээр дорхноо идээшиж бас нэгэн гэрэлт од болсон юм. Өндөр, бадриун боловч чадварлаг тоглогч Хар муурнуудын төлөө лигийн 209 гоол хийсэн нь тэдний бүх цаг үеийн жагсаалтад 2 дугаар байрыг эзлэдэг. Хэрбэрт Чапман түүнийг 33 настай байхад нь багтаа нэгтгэж маш үнэтэй 20 гоол хийлгэсэн ба 1927 онд Кардифф Ситид 2-1ээр хожигдоход Арсеналын тоглогчдыг ахлан гарч байжээ.

Алекс Жеймс (Alex James, 1929-37)
261 тоглолт, 27 гоол

1928 онд Английг Вэмблид нь 5-1ээр ялсан Шотланд Шидтэнүүдийн түлхүүр тоглогч байсан Жеймс 1929 онд Престон Норт Энд клубээс Арсенал руу 9000 паундаар ирж байв. Зүүн жигүүрийн довтлогч (inside left) байсан боловч аль аль жигүүр лүү болон корридороор үхлийн дамжуулалт өгдөг чадварыг нь Хэрбэрт Чапман гарамгай ашиглаж багийн довтолгооны гол эх үүсвэр, үндсэн стратегич болгон хувиргасан юм. Өөрөө гоол хийхээсээ илүү үүсгэдэг тоглогч болсон Алекс маань анхны гоолоо 1930 оны ФА Капын финалаар Хаддерсфилд Тауныг 2-0оор хожиход хийсэн билээ. Энэ цом бол Арсеналын хамгийн анхны томоохон цом байсан бөгөөд 1935 онд Хайберид Шэффилд Вэнсдэйн эсрэг гайхамшигтай хаттрикийг бас хийсэн байдаг. 1932 оны ФА Капыг гэмтлийн улмаас өнжсөн боловч 1936 оны финалаар Вэмблид багаа ахалж, мөн дөрвөн ч удаа багтайгаа лигт түрүүлсэн юм.

Брин Жонс (Bryn Jones, 1938-49)
76 тоглолт, 8 гоол

Дэлхийн 2-р дайн эхэлчихээгүй бол 1938 онд Волвэсээс авчрахдаа төлсөн тухайн үеийн дэлхийн рекорд 14 мянган паундын үнээ Брин Жонс өлхөн нөхөхөөр байлаа. Зүүн жигүүрийн довтлогчоор нөхөр Алекс Жеймсийг орлож, гоолын хур буулгахын тулд тэрээр ирсэн боловч эхний 30 тоглолтдоо дөнгөж 4-хөн удаа гоолдсон юм. Гэхдээ 1942 онд Зэвсэгт хүчнээс чөлөөгөөр ирээд байхдаа Чарлтон Атлетикийг 6-2оор хожсон тоглолтод хаттрик хийж байсан. Уэлссийн шигшээд анх 1935 онд дуудагдаад хамгийн сүүлд Шотландын эсрэг 1949 онд тоглож байв. 1947/48 улирлаар Арсенал лигт түрүүлэхэд 7 удаа тоглосон боловч энэ нь ялагчийн медаль авахад хангалтгүй байлаа. Улмаар 1949 онд Норвич Сити рүү явсан юм.

Жимми Логи (Jimmy Logie, 1939-55)
328 тоглолт, 76 гоол

Багийнхныхаа хүндлэлийг бүрэн хүлээсэн Логи дайны дараах Арсеналын довтолгооны гол хөдөлгүүр болж байсан боловч зөвхөн дотоодын лигийнхнээсээ шигшээдээ дуудах өвчин туссан байсан Шотландуудаас болж шигшээдээ ердөө ганц дуудагдсан нь харамсалтай. Эдинбургийн хүү 1939 онд өсвөрийн Лохор Велфэйр багаас Арсеналд ирсэн боловч Тэнгисийн Десантад дуудагджээ. Олон жилийн дараа 1946 оны 8 сарын 31-нд арай гэж Арсеналын төлөө анхны тоглолтоо хийж байсан түүхтэй. Зүүн хагаст хэсэг тоглосон боловч баруун жигүүрийн довтолгоонд маш идэвхитэй тоглодог боллоо. Бөмбөг эзэмших чадвар, уралдуулж хаясан дамжуулалтууд, холбон тоглох чадвар зэрэг нь түүнийг маш аюултай тоглогч болгож байсан бөгөөд нийт тоглосон 9 улиралдаа 32-оос багагүй тоглолтод тоглож байв. Тэрээр хоёр удаа лигийн түрүү авсан бөгөөд 1950 оны ФА Капын финалд Ливерпүүлийг 2-0оор хожиход хоёр дамжуулалтыг өгсөн юм.

Жимми Блүмфилд (Jimmy Bloomfield, 1954-60)
227 тоглолт, 56 гоол

Тансаг тоглолттой зүүн жигүүрийн довтлогч маань 1954 оны 7 дугаар сард Брентфордоос Их буучдын эгнээнд нэгдэж, Жимми Логигийн залгамжлагчаар нэрлэгдсэн ба гурван сарын дараа анхны тоглолтоороо Шеффилд Вэнсдэйн эсрэг хожлын гоол хийж байв. Ерөнхийдөө нэг их гоол хийгээд байдаггүй байсан боловч 1956/57 улирлын 86 гоол хийсэн (эдгээрээс 10 нь түүний нэр дээр бүртгэлтэй) залуу довтлогчдын гол цөм нь байлаа. 1960 онд Жорж Истхам ирснээр тэрээр клубыг орхиж Бирмингэм Сити рүү явсан билээ. Тоглогчийн карьераа дуусгаад амжилттай, дэвшилтэт менежер болсон ба Лутон Тауныг удирдаж байгаад 1983 онд дөнгөж 49 насандаа хорт хавдраар өөд болсон билээ.

Жорж Истхам (George Eastham, 1960-66)
223 тоглолт, 41 гоол

Онцгой чадвартай баруун жигүүрийн довтлогч Истхам 1966 оны Дэлхийн Аварга Шалгаруулах Тэмцээнээр Английн бүрэлдэхүүнд багтсан ч сэлгээнээс ганц ч гарч тоглож чадаагүй азгүй тоглогч. Тэрээр Арсеналын эгнээнд 1960 онд нэгдэхдээ Ньюкасл Юнайтедтай гэрээний маргаанаас болж зам салж иржээ. “Боолын гэрээ” гэж түүний нэрлэсэн тэрхүү гэрээний маргаан 3 жил үргэлжилж Дээд шүүхэд хүрч байж түүний ялалтаар өндөрлөснөөр тоглогчдын эрхийн асуудалд томоохон нөлөө үзүүлсэн юм. Шаргал үстэй, өндөр, төгс хөгжилтэй, ур чадвартай, сэргэлэн тэрээр фэнүүдийн хайрыг татдаг байсан бөгөөд багийнхандаа тоолж баршгүй олон гоолын дамжуулалт өгч байлаа. Хайберигаас Стоук Сити рүү очоод Лигийн Цомд түрүүлсэн ба Өмнөд Африкт менежер хийж байсан юм.

Чарли Жорж (Charlie George, 1968-75)
179 тоглолт, 49 гоол

Арсеналын хаяанд мэндэлж, Арсеналыг сургуульд байхын дэмжиж ирсэн Жорж бурхнаас заяасан онцгой авъяастай тоглогч байв. Чарли ур чадвар, тамир тэнхээ, бөмбөг эзэмших, хоёрдугаар давхрын тоглолт, баруун хөлийн өшиглөлт зэрэг маш олон авъяастай байсан бөгөөд 1971 оны алдар Хос цомтой улиралд ФА Капын финалаар Ливерпүүлийн эсрэг чухамхүү тэр хөлөөрөө гоолдоод гараа алдлан газарт тэрийн унасан дүрсээрээ олон фэнүүдийн дурсамжинд мөнхөрсөн билээ. Тэрээр 1970 оны Яармагийн Цомд (Fairs Cup) түрүүлсэн ба олон цом хожих замдаа орсон гэгдэж байсан ч 1975 онд ихээхэн маргаантай нөхцөл байдал дунд Дерби Каунти руу зарагдан одсон юм. Тэрээр Арсеналын төлөө гэсэн сэтгэлтэй хэвээр үлдсэн ба одоогоор Клубын Домгуудын аяллыг хариуцан ажиллаж байгаа билээ.

Алан Болл (Alan Ball, 1971-76)
218 тоглолт, 52 гоол

1966 оны Дэлхийн аварга Английн баатар жигүүрийн довтлогч Болл 1971 оны 12 дугаар сард 26 настай Арсеналд ирэх үедээ ид оргил үедээ гялалзаж байлаа. 1966 онд Блакпүүлийн тоглогч байсан тэрээр ДАШТ-ий дараа Эвэртонд очиж 1969/70 улиралд тэднийг лигт түрүүлэхэд тусласан ба Хос цомоо бататгах зорилготой Арсенал түүний төлөө 220 мянган паундыг төлсөн юм. Болтоны өсвөрийн багт байхад нь “морины хүүхэд шиг” гэж шоолдог байсан ч түүний цуцашгүй эрч хүч, ухаалаг тоглолт нь маш сайн найруулан тоглогч болгосон бөгөөд 1972 оны ФА Капын финалд багаа хөтөлсөн билээ. Гэвч тэр золгүй тоглолт Лийдс Юнайтедын хожлоор өндөрлөсөн бөгөөд цомгүй Болл 1975 онд Арсеналаас явсан юм.

Лиам Брэди (Liam Brady, 1973-80)
307 тоглолт, 59 гоол

Ирландын шигшээгийн зүүн жигүүрийн довтлогч Брэди гайхалтай цохилттой, маш стратегич тоглогч байлаа. Төрөлх Дублиндаа байхдаа 13 насандаа илрүүлэгдсэн тэрээр Арсеналд сургуулийн амралтаараа Арсеналд ирж бэлтгэл хийдэг байсан бөгөөд 1973 оны 10 сард 17 насандаа клубын төлөө анхны тоглолтоо хийсэн юм. Брэди гурван улиралд дараалан ФА Капын финалд Арсеналын төлөө тоглосон бөгөөд 1978 онд Ипсвич Таунд хожигдоход гэмтлээ бүрэн эдгээж чадаагүй байсан ч хойд жил нь Манчестер Юнайтедыг цаг дуусч байхад хожих үед хамгийн оргил тоглолтоо үзүүлсэн юм. 1980 оны финалд Вэст Хам Юнайтедтай тоглохдоо Европын Цомтой багуудын Цомын финал гэх мэт дараалсан баахан тоглолтуудад тоглож ядарсан байсан учраас хэд хойшоо татаж тоглосон гэж шүүмжлэгдэж байв. Арсеналын дараа Ювэнтус руу очиж хоёр ч Сери А тайтл хүртсэн юм.

Пол Дэйвис (Paul Davis, 1978-95)
447 тоглолт, 37 гоол

Лиам Брэдийг явахад араас нь залгамжилсан тоглогч бол Арсеналтай 13 наснаасаа хойш холбоотой байсан үнэнч фэн байлаа. “Энэ цэнгэлдэх бол миний хувьд амьдрал минь. Миний биеийн эд эрхтэн гэсэн үг” гэж Пол Дэйвис хэлж байсан удаатай. Брэдийн нэгэн адил 17 насандаа 1981 оны 3 дугаар сард Ливерпүүлийн эсрэг Арсеналын төлөө анхны тоглолтоо хийж байсан. Зүүн жигүүрт хэсэгхэн тоглосон боловч 1982 оноос эхлэн баруун жигүүрээр тоглож өөрийн алдарт зүүн хөлийн дамжуулалтуудаа хийдэг байлаа. Түүний гайхамшигтай карьерын ганц сүүдэртэй тал нь гэвэл 1988 онд үнэхээрийн их өдөөлтийг тэвчилгүй Соутхамптоны Гленн Кокерилын эрүүг мулт шанаадаж 9 тоглолтоор торгуульсан явдал байлаа. Менежер Жорж Грэм түүнийг сэлгээнд хадсан ба 1993 онд тэрээр өөрийн байрыг эргүүлэн авч Арсеналыг ФА Кап, Лигийн Цомыг хосоор өргөхөд тусласан билээ.

Жак Вилшэр (Jack Wilshere, 2008 оноос хойш)
113 тоглолт, 7 гоол

Сургуульд байхдаа Лутон Тауны академид элсээд удалгүй 2001 онд 9 настайдаа Арсеналын эгнээнд нэгдсэн. Өөрийн үе тэнгийн Англи тоглогч нар дундаа хамгийн авъяаслаг найруулан тоглогч маань Англи тоглогч нарт ховорхон заяасан дамжуулагч билээ. 16 нас 256 хоногтой байхдаа Арсеналын төлөө анхны тоглолтоо хийснээр лигийн тоглолтод тоглосон хамгийн залуу тоглогч болсон. 18 настай байхдаа Английн төлөө анхны тоглолтоо Вэмблид Францын эсрэг хийж байсан. Гэмтлийн улмаас 2011/12 улиралд огт тоглоогүй бөгөөд өнгөрсөн улиралд гэмтлээ эдгээж ирээд Аваргуудын Лигийн байрыг эзлэхэд гол нөлөөг үзүүлсэн. 2011/12 улиралд Барселонаг хожиход Шави, Иниеста нарын эсрэг тоглосон гэдэг ганц баримт түүний ур чадварыг хангалттай батлан харуулж байгаа юм.

Мэсүт Өзил (Mesut Ozil, 2013 оноос хойш)
13 тоглолт, 3 гоол

Энэ зуны наймааны цонх хаагдаж байх мөчид Арсеналын наймааны үнийн рекордыг эвдэж, Реал Мадридын тоглогчдын халаглах дуугаар жигүүрлэн ирсэн Мэсүт Өзил. Халаглах нь ч аргагүй, учир нь Германы шигшээгийн найруулагчийн бөмбөг эзэмших, байрлалаа эзлэх чадвар, ухаалаг дамжуулалт, тоглолтууд нүднээ ил. Гайхалтай мэдрэмжтэй зүүн хөлийн цохилтоо Наполигийн эсрэг багийн төлөө анхны гоолоороо харуулж амжсан. Түрк гаралтай боловч Германд төрж өссөн тоглогч маань 2010 оны Өмнөд Африкийн Дэлхийн Аваргааар од болон гялалзсаныхаа дараа Вэрдэр Бременээс Испанийг зорин одсон. Мадридад тэрээр Лиг, Испанийн цом, Испанийн Супер цом зэрэг цомуудыг хураасан бөгөөд Арсеналын фэнүүд түүний цомын цуглуулга үүгээр өндөрлөхгүй байгаасай гэж хүсэж байгаа нь дамжиггүй.

Бантагнасан: Цогоо
Эх сурвалж: Арсенал цэг ком

Зуутын клуб

Өнгөрсөн Баасан гаригт Арсенал клуб хуучин буунуудынхаа алдрыг мандуулах зорилго бүхий Зуутын клубыг үүсгэлээ. Клубын төлөө 100 буюу түүнээс дээш тоглолт хийсэн ба одоогоор зодог тайлаад байгаа 71 тоглогч энэхүү клубын гишүүнээр нэрлэгдлээ. Клубын үүсгэн байгуулагч нь Арсеналын удирдах зөвлөлийн дарга Сэр Чипс Кесвик болон 1971 оны Хос цомын эзэн, хаалгач Боб Вилсон нар юм.

Үүсгэн байгуулах арга хэмжээнд дахиад хоёр хаалгач (Жимми Риммер, Жон Лукич) мөн хамгаалагч Билли МакГуллох, Лорэн, клубын төлөө хамгийн олон тоглосон Дэвид О'Лири нар ирцгээсэн байв. 1989 оны Ливерпүүлийн алдарт гоолыг хийж хожил авчирсан хагас хамгаалагч Майкл Томас, Ялагдашгүй багийн од Робэр Пирэс, Алан Скиртон, довтлогч Тони Вүүдкок, Жон Радфорд, Алан Смит зэрэг хүмүүс баярын ажиллагаанд ирж оролцлоо.

78 настай Билли "Флинт" МакГуллох энд ирсэн хүмүүсийн хамгийн ахмад нь байсан бол 1950 оны ФА Капын аваргуудын ганц үлдсэн гишүүн болох одоо Өмнөд Африкт амьдарч байгаа Алекс Форбес Зуутын клубын хамгийн ахмад гишүүн болж байна.

Тоглож байх хугацаандаа Зуутын клубын гишүүд маань Клубын 27 томоохон цомын 20-ийг нь авахад хувь нэмрээ оруулж байжээ. Тэдний тоглосон тоглолтын нийлбэр нь 54 улирлын турш 16,122 тоглолт болж байна.

Тэднийг Эмирэйтс цэнгэлдэхэд угтаж авахдаа Сэр Чипс Кесвик ингэж ярив. "Эдгээр шилдэг хуучин тоглогч нарыг Зуутын Клубтээ урьж байгаадаа би үнэхээр их баяртай байна. Энд цугласан хүмүүсийн царай Арсеналтай холбоотой хэн бүхний хамгийн сайхан дурсамжуудтай холбоотой нь гарцаагүй. Өсөн дэвжиж, өөдөө зүтгэхийн хажуугаар клубыг өдий зэрэгт хүргэхэд өөрсдийн хувь нэмрээ харамгүй оруулсан хуучин тоглогч нараа санаж байх нь зүйтэй юм. Зуутын клубынхэнтэйгээ тоглолтууд дээр тааралдаж байхыг хүсч байна."

Боб Вилсон, Пат Райс, Франк МакЛинток нараар удирдуулсан Зуутын Клубын гишүүд Арсеналтай нягт холбоотой ажиллаж, Эмирэйтс цэнгэлдэхэд тоглолт үзэх, арга хэмжээ зохион байгуулах зэргээр ажиллах ба Зуутын клубын нэрэмжит эксэкютив бокс буюу тоглолт үзэх танхим клубын гишүүдэд байнга нээлттэй байх юм. Энэ танхимыг зарим үед фэнүүд түрээслэх боломжтой.

Тус клубын удирдах зөвлөлийн гишүүн бөгөөд Арсеналын хаалгач асан Боб Вилсон ингэж ярив. "Пат Райс, Франк МакЛинток бид гурав клубтэй харьцаагаа үргэлжлүүлж, хувь нэмрээ оруулсан хэвээр байгаа асар олон хуучин тоглогч нартай холбоотой ажил хийх хэрэгтэй тухай ярихад Клубын зүгээс их нааштай хүлээж авсан бөгөөд одоо ингээд энэ клубээ нээж байгаадаа би их баяртай байна.

Арсенал бол арвин түүх, уламжлал, класстай клуб бөгөөд зуутын клубын гишүүн болгон Арсеналтай албан ёсны холбоотой байхыг хүсдэг гэдэг би итгэлтэй байна. Бид бол нэг том гэр бүл, эдгээр тоглогчидтойгоо Эмирэйтст болон бусад арга хэмжээнүүдийн үеэр байнга тааралдаж байхыг би хүсч байна."

Зуутын клубын гишүүн бүр тусгай загварын улаан, цагаан өнгөтэй зангиатай байх ба Арсеналын төлөө лигийн 100 буюу түүнээс дээш тоглолттой тоглогч нар зодог тайлсныхаа дараа энэхүү клубын гишүүн болж, зангиагаар шагнагдах юм.

Одоо байгаа гишүүд:

Player	Career	Total Arsenal Apps
Alex Forbes	1948-1956	217
Vic Groves	1955-1964	185
David Herd	1955-1961	166
John Barnwell	1957-1964	138
Billy McCullough	1958-1966	253
Jimmy Magill	1959-1965	116
Terry Neill	1960-1970	241
Alan Skirton	1960-1966	145
George Eastham	1960-1966	207
Jonny MacLeod	1961-1964	101
David Court	1962-1970	175
Bob Wilson	1963-1974	234
Jim Furnell	1963-1968	141
Ian Ure	1963-1969	168
Jon Sammels	1963-1971	215
John Radford	1964-1976	379
Peter Simpson	1964-1978	370
Frank McLintock	1964-1973	314
Peter Storey	1965-1977	391
George Graham	1966-1972	227
Bob McNab	1966-1975	278
Pat Rice	1967-1980	397
Eddie Kelly	1969-1975	175
Charlie George	1969-1975	133
Ray Kennedy	1969-1974	158
Sammy Nelson	1969-1981	255
David Price	1973-1981	126
Liam Brady	1973-1980	235
Jimmy Rimmer	1974-1977	124
Frank Stapleton	1975-1981	225
David O'Leary	1975-1993	558
Graham Rix	1977-1988	351
Pat Jennings	1977-1984	237
Willie Young	1977-1981	170
Alan Sunderland	1977-1983	206
John Hollins	1979-1983	127
Brian Talbot	1979-1985	254
Paul Davis	1980-1994	351
Kenny Sansom	1980-1988	314
Stewart Robson	1981-1986	151
Tony Woodcock	1982-1986	131
Charlie Nicholas	1983-1987	151
Tony Adams	1983-2002	504
John Lukic	1984-1990	241
Viv Anderson	1984-1987	120
Martin Hayes	1985-1990	102
Paul Merson	1986-1997	327
Perry Groves	1986-1992	156
Alan Smith	1987-1995	264
Michael Thomas	1987-1991	163
Nigel Winterburn	1987-2000	440
Kevin Campbell	1988-1995	166
Lee Dixon	1988-2002	458
Steve Bould	1988-1999	287
David Seaman	1990-2003	405
Andy Linighan	1990-1996	118
David Hillier	1990-1996	104
Ian Wright	1991-1998	221
Ray Parlour	1992-2004	333
Martin Keown	1993-2004	332
Dennis Bergkamp	1995-2006	315
Patrick Vieira	1996-2005	279
Gilles Grimandi	1997-2002	114
Marc Overmars	1997-2000	100
Freddie Ljungberg	1998-2007	216
Nwankwo Kanu	1999-2004	119
Sylvain Wiltord	2000-2004	106
Robert Pires	2000-2006	189
Lauren	2000-2006	159
Sol Cambell	2001-2006	146
Jens Lehmann	2003-2011	148

Одоогоор зодог тайлаагүй байгаа дараах 20 тоглогч энэхүү клубын гишүүн болно.

Player	Career	Total Arsenal Apps
Ashley Cole	1999-2006	156
Thierry Henry	1999-2007	258
Kolo Toure	2002-2009	225
Gilberto	2002-2008	170
Cesc Fabregas	2003-2011	212
Gael Clichy	2003-2011	187
Robin van Persie	2004-2012	194
Manuel Almunia	2004-2012	109
Mathieu Flamini	2004-2008	109
Nicklas Bendtner	2005-2013	101
Alex Song	2005-2012	138
Emmanuel Eboue	2005-2011	132
Theo Walcott	2006-2013	181
Tomas Rosicky	2006-2013	129
Abou Diaby	2006-2013	123
Emmanuel Adebayor	2006-2009	104
William Gallas	2006-2010	101
Bacary Sagna	2007-2013	182
Aaron Ramsey	2008-2013	119
Andrey Arshavin	2009-2013	105

Эх сурвалж: Арсенал цэг ком

Арбатын хүүхдүүд ээ гэж…

Анатолий Рыбаковын Арбатын хүүхдүүд гурамсан романыг саяхан уншиж дууслаа. Уг нь их эрт дууссан боловч ажил, ажил, ажил гэсээр сэтгэгдлээ сийрүүлэх зав одоо л гарч байна. Анх Горбачевт уншуулахад бараг өдөржин, шөнөжингөө сууж уншиж дуусгаад, яаралтай хэвлэж гарга гэж тушаасан гэлцэх юм билээ. Хажууд нь байсан биш би яаж мэдэх вэ.

Үйл явдал нь 1930-аад оны орчмоос Дэлхийн 2-р дайн хүртэл явж байгаа.  Ер нь товчхондоо гэвэл “Их хүссэн хүнд төрийн жолоо бүү атгуул” гэсэн сургаалийг дагахгүй бол ямар үр дагавартайг харуулж байгаа гэж ойлгож болно. Ленин нас барахаасаа өмнө гэрээслэл бичиж Намын төв хороонд үлдээсэн гэсэн яриа байдаг бөгөөд уг гэрээслэлд Троцкийг өөрийнх нь оронд тавьж Сталиныг дэвшүүлэхгүй байх тухай санал болгосон байдаг байна.  Сталин өөрөөсөө бусдыг үл тоодог ба намын ахмад гишүүд түүнийг үл тоомсорлодогт яснаасаа дургүй байж. Лениний үхлийг өөрийн дээш гарах боломж гэж харж байсан учраас өөрийн бүх үйлдлийг нарийн тооцоолж элдэв арга саам хийн дээшээ гарч ирсэн байна.

Аливаа гэнэн цайлган сэтгэлтэй улс ямагт тэргүүн эгнээнд золиос болж байдгийг энэ зохиол маш тод томруун харуулдаг.

Саша Панкратов бол угийн цэх шударга зантай, ажил мэргэжилтэй сайн, сурлага, мэдлэгээр ч муугүй, найз нөхөддөө ханилгаатай, Орос орны ирээдүй болсон шинэ залуу сэхээтний төлөөлөл. Өөрөөр хэлбэл жинхэнэ Орос мужик. Аливаа эрүүл ухаантай хүний зангаар магтаал хэтэрвэл хор болдог гэж боддог учраас ханын сонин дээр Сталиныг магтсан шад оруулахын оронд ангийн нөхрийг нөхөрсөг шоглосон нь дээр гэж үзсэн нь өөнтөгч нөхдийн хараанд өртөж улс төрийн хэрэг үүсдэг. Уг нь эрх мэдэлтний улыг нэг долоогоод, уучлал өршөөл эрсэн бол асуудал хүчээ авахгүй намжих байсан боловч түүний цэх шударга, нэрээ хичээмхий зан гай болж орхино. (Ер нь ингэдгийг нь бодохоор энэ шал хэрэггүй зан мэт)

Үлгэр дуурайлаа болгож явдаг Марк ах уг нь дээгүүр жаалж байгаа л даа. Төв хорооны орлогч гишүүн энэ тэр болоод. Ганц утсаар ярихад л асуудал намжих. Тэгэхдээ “тэднийхэн” тэгдэггүй хүмүүс. Үнэнээр явбал үхэр тэргээр туулай гүйцэж болно оо доо. Гэвч харамсалтай нь энэ удаа тэгсэнгүй. Гурван жил Сибирийн цөллөг. 

Хэзээнээс нааш намын дотор том статустай байсан Ленинград буюу одоогийнхоор Санкт Петербургийн намын хорооны зүтгэлтэн Киров Сталинд таалагддаггүй байжээ. Нөхөр Сталинаас өөр үзэлтэй байж яав ч таарахгүй. Шинэ эдийн засгийн бодлого гэгч хэрэгжихийн хэрээр маш амжилттай ажиллаж байгаа зарим нэг нөхөд ч түүнд таалагдахгүй. Гэхдээ сахалт тэднийг шууд няслаад няслаад явчихаж арай л завдахгүй. Шалтаг алга. Террористууд. Троцкий нам, эх орноосоо хөөгдсөнийхөө төлөө намын одоогийн удирдлагуудыг алан хядаж, төрийн эрхийг булаахаар оролдож байгаа. Үүнд итгэх хүн байна уу? До яамныхан олчихно. Нөхөр Сталин тэдэн даалгавар өгөх ч шаардлага байхгүй. (Саша Барон Кохэний Дарангуйлагч кинон дээр гардаг хоолой хэрчих үйлдэлэрхүү юм хийчихэд л бараг болчихно. Бага зэргийн хэтрүүлэг хэрэглэв. Өршөөх ажаамуу.) Кировыг алчихлаа. Нам, засагт нөхөж баршгүй гарз учрах нь тэр. Сталин “маш их эмгэнэв”.

Эхний ботийн нэр Арбатын хүүхдүүд. Өөрөөр хэлбэл Сашагийн ангийнхан. Янз бүрийн ааш зантай, янз бүрийн гарал үүсэлтэй хүмүүс. Ёстой л “эрдмийн ширээнд тохой залган” сууцгааж асан хүүхдүүд амьдралын эргүүлэгт хэрхэн хөл алдаж, унаж, босож явааг харуулна. Гурамсан романы эхний хэсэгт үе тэнгийн нөхөд хэрхэн өөр өөрийн явах ёстой замыг олж, мөрөө хөөн одож байгааг харуулдаг.  Юра Шарок, Нина Иванова, түүний дүү Варя, Максим, Вика, Лена. Саша бол мэдээж Сибирь лүү явж байгаа. Харин бусад нь хаашаа явж байгаа бол?

Хаашаа явж байгаа нь дараагийн боть болох Айдас романаас мэдэгдэнэ. Сталин өөрийн бодож төлөвлөж байсан ажлаа зугуухан эхлэх нь Орос орны алдартай хатуу өвлийн эрч чангарах мэт. Нэг хүний гарт төвлөрсөн хязгааргүй эрх мэдэл. Түүний хямсганан муухай харах төдийгөөр хүмүүсийн амьдрал нуран унаж, балран бүдгэрнэ. (Түүний өвөр дээр суугаад зургаа авахуулснаар алдаршсан халимаг охины түүхийг саяхан уншсан. Пан-Монголист үзэлтэй байсан ааваас нь болоод тэр хөөрхөн охиноос амьдралыг нь булаан авсан гэдэг юм. Энэ тэгэхдээ өөр түүх л дээ.)

Кировыг “алдсанаас” болж маш их “гашуудсан” Сталин түүний өс хонзонг Оросын ард түмнээс авч эхлэв. Ер нь түүнийг анхнаасаа үл тоомсорлодог байснаараа намын ахмад гишүүд буруутай. Түүнээс өөр үзэл бодолтой байж зүрхэлсэн Төв хорооны гишүүд буруутай. Сталинаас өөр хүнд итгэж зүрхэлсэн үсчин өвгөн буруутай. Цэх шударга байж, мужик зан гаргаж чаддаг бүх хүн буруутай. Буруу, буруу, буруу бүхэн бусдын буруу. (хүүхдийн дуунаас эш татав. ) Сталин ганцаараа буруугүй. Тэр бол бурхан. Тэрээр хүмүүст амьдрал бэлэглэж байлаа. Яг л болор жүнз шиг. Маш олон болор жүнзнүүдийг тэр хана, тааз, хаалга руу дураараа шидэлж байлаа. Үхлийн тухай ярих юм биш. Агуу их үйлсийг бүтээхэд багаахан хэмжээний гарз юу ч биш шүү дээ. Харин агуу их зүйл гэдгээ мань эр хүмүүсийн боддогоос эрс өөрөөр тодорхойлсонд л хамаг гай нь оршиж байна. Гэтэл баруун зүгт Гитлерийнхэн гал өрдөөд түймэрт бэлдээд байдаг. Түймрийн замд Зөвлөлтийн ард түмэн айдсаараа аргамжигдчихаад хөдлөх аргагүй.

Санаандгүй сонгосон түймэр хэмээх миний тодорхойлолтод жигтэйхэн зохисон Үнс чандруу гэдэг роман бол гурамсан романы төгсгөл. Сталины өгсөн зохиолын дагуу До яамныхны дэглэсэн асар том ажиллагаа ерөнхийдөө дуусах шатандаа орсон. Улс төрийнхнөөр эхлээд цэргийнхэн дунд үргэлжилсэн ажиллагаа одоогоор төрсөн бууриа буюу До яамандаа эргэн ирж эх барьж авсан тусгай ажилчдаа хөнөөж байв. Яг л төрүүлсэн эхээ барьж иддэг шавж мэт. (уг нь сурснаараа шавьж гээд биччихмээр байвч дүрмээр шавж гэж бичдэг болсон гэсэн) Нар буцах 6 сарын 22-ны өдрийн Барбосса ажиллагааны тухай хүн болгон л мэдэх байлгүй. “Германы фашистууд итгэл эвдэн довтолсон” гэж ирээд л бидний багад ухуулдаг байв аа. Үнэхээр итгэл даадаггүй яасан муухай царай шигээ сэтгэлтэй улс байдгийн бэ гэж өсвөр нас хүртлээ л бодож явлаа. Улс төр, цэргийнхнийгээ ингэж их цөлмөчихсөн байсан улс руу цахилгаан дайралт хийхээр орсон Германууд ёстой дураараа дургиж дунд чөмгөөрөө жиргэдэг юм байгаа биз дээ.

Нэг мэдсэн чинь хадуурчихсан явж байна. Уг нь би хөөрхий Сашагийн тухай бичье гэж эхэлсэн юм. Нөхцөл байдлын тухай мэдээллийг хүргэх гэсээр хэтэрхий нуршиж уншигч таныг чилээсэн бол өршөөх ажаамуу.

Саша бол тэнэг. Уншиж дууссаныхаа дараа би ингэж бодов. Тэнэг хүнийг тэнгэр түшдэг гэдэг биз. Айсуй аянганаас зайлсхийлгэх гэсэндээ тэнгэр түүнийг хүйтэн бороонд норгож. Талийгаач Кировоос хойш Сашагийн асуудал үүссэн бол энэ зохиол ингэж удаан үргэлжлэхгүйсэн. Талд төөрсөн хүмүүс алсад байгаа цэгээр баримжаа авч, тэрхүү газрыг л зорин алхдаг шиг Сибирийн цөллөгт арга мухардан ирсэн Саша ангийн охины дүү Варяг өөрийн луужин, ирээгүй амьдралын бэлэг тэмдэг болгоно. Ер нь ирээдүйгээ харж байгаа хүн өнөөдрийг тэвчдэг хойно доо.

Варягийн хувьд богино жолоотой бүсгүй хүний зөнгөөр нөмөр нөөлөг хайж хэсэг тэмтчинэ. Түүнийг гэсэн эрчүүд олон байсан ч цөллөгөнд “сайн дураараа” явсан хүлцэнгүй Саша шиг мужик олон байсангүй. Яахав хөөрхий гуравхан жил тэсэхэд гайгүй сайн нөхөр болчих хүн ирнэ шүү дээ. Үнэндээ тэр дурласан байж. Өдөр болгон ээжид нь тусалж, ачилсаар байгаад түүндээ дурлачихсан байж. Уг нь ингээд тэр хоёр уулзсан бол ч… Сибириэс Варяг мөрөөдөх Саша, цөллөгөөс Сашаг хүлээх Варя.

Үнэндээ энэ зохиол улс төр, хэлмэгдүүлэлт, хууралт, мэхлэлтийн тухай биш юм. Энэ бол ерөөсөө хүний араншинг харуулсан нэвтэрхий толь. Арбатын хүүхдүүд амьдралын шуурганд ямар зүгт яаж явж байгаагаар уншигч хүмүүсийг толинд харуулж байгаа хэрэг. Хүн болгон өөрийгөө Саша шиг байгаасай гэж хүсдэг байх. Төгс хүн гэж байхгүй шүү дээ. Дүрүүдээс та өөрийгөө хайгаарай. Би өөрийгөө хоёр ч газраас олсон. Хоёулангийнх нь зан чанар таалагдсан ч, хувь тавилан нь таалагдаагүй.

Цаашаа бичмээр байвч уншаагүй хүмүүсээ бодоод ингэсгээд зогсоё доо. Угаасаа хэтэрхий нуршчихлаа. Зохиолын бараг ихэнхийг ингээд биччихлээ.

Цогоо

2013.10.09

Улаанбаатар хот 

ВЭНГЭРИЙН 17 ЖИЛ

Арсеналын хамгийн амжилттай бөгөөд хамгийн удаан ажиллаж байгаа менежер Арсэн Вэнгэрийн ажиллаж эхэлсний 17 жилийн ой өнөөдөр (10 дугаар сарын 1) тохиож байна.

Өнгөрсөн бүтэн сайн өдрийн Свансид хийсэн тоглолт түүний 964 дэх тоглолт, 558 дахь хожил байлаа.

Түүний хожлын хувь нь 57.9 байгаа бол энэ хугацаанд нийт 1786 гоол орсон нь тоглолт тутамд дунджаар 1.85 гоол орж байсан гэсэн үг юм. Харин энэ хугацааны гоолын зөрүү нь +857.

Арсэн Вэнгэрийн тоглолтууд

Энэ нь тэрээр Арсеналыг урьд өмнө удирдаж байсан бүх менежерүүдээс олон тоглолт хийж, олон хожил авчирч (мөн олон хожигдол, бас тэнцээ) байсан гэсэн үг юм. Тэрээр өмнөх менежерүүдээс олон цом хожсон (коммюнити шилд зэргийг оруулаад 11 ширхэг) ба хожлын хувиар ч хамаагүй илүү.

Түүний багууд өмнөх менежерүүдээс илүү олон гоол хийсэн (яг арынхаа хүний багаас хоёр дахин илүү) бөгөөд Арсеналын түүхэнд байсан бүх менежерүүдээс илүү олон удаа лиг, Хөлбөмбөгийн Холбооны Цом, Лигийн Цом, Европын тоглолтууд болон Коммюнити шилдийн тоглолтуудыг удирдаж явуулсан.

1996 оны 8 дугаар сард Японы Грампус Эйт хэмээх багийг удирдаж байх үедээ Брюс Риокийг залгамжилж Арсеналыг удирдах болно хэмээн зарлагдсан ч албан ёсоор 10 сарын 1-нд Арсеналын хүн болсон юм. Япон дахь багийн гэрээ дууссаны дараа албан ёсны анхны тоглолтоо 1996 оны 10-р сарын 12-ны өдөр Блакбурны талбай дээр хийж 2-0оор хожиж байв.

Дэлхийн Хоёрдугаар дайны үед ажиллаж байсан Жорж Аллисоны 13 жилийн хугацааг дөрвөн жилийн өмнө гүйцэхдээ Вэнгэр клубын хамгийн удаан ажиллаж байгаа менежер болсон юм.

Клубыг удирдан лигт түрүүлсэн 6 менежер байдгийн нэг нь Вэнгэр. Харин Хөлбөмбөгийн Холбооны цомыг нэгээс олон удаа өргөсөн цорын ганц менежер. Арсеналын нэр дээр байдаг 27 томоохон цомуудыг 7 хүн хамтран цуглуулсан (Чапман, Аллисон, Виттакер, Мий, Грам, Неил, тэгээд Вэнгэр).

Хожлын хувь ярьвал Вэнгэрийн 57.9 хувь бусад менежерүүдээс хавьгүй илүү байгаа юм. Дайнаас хойшх менежерүүдээс тэр л ганцаараа нийт тоглолтын талаас илүүд нь хожсон гэсэн үзүүлэлттэй. Нарийн ярьвал дараагийнхаа 130 тоглолтод хожигдсон ч гэсэн хамгийн өндөр хожлын хувьтай нь хэвээрээ л байх болно.

Арсеналын Премьер лигийн тоглолтын 78.9 хувийг (644 тоглолт) удирдаж, нийт онооны 83.2 хувийг (1279 оноо) цуглуулсан байдаг. Мөн Европын тоглолтын 68.7 хувийг (169) удирдсан.

Хамгийн багадаа 100 тоглолт хийсэн менежерүүдийн хожлын хувь

Анхныхаа бүтэн улиралдаа Вэнгэр дотоодын тэмцээний хос цом авсан (Английн лигт түрүүлсэн анхны менежер) ба энийгээ 4 жилийн дараа дахин давтсан. Хос цом бүхий 2001-02 улирал түүний хувьд хамгийн өндөр хожлын хувьтай нь хэвээрээ байгаа. 60 тоглолтынхоо 65 хувийг хожсон.

60 хувиас илүү хожилтой байсан эхний гурван улиралд Арсенал лигтээ түрүүлсэн (1997-98, 2001-02, 2003-04) боловч гурав дахь түрүүнээс хойш лигт түрүүлэх хэцүү болж эхэлсэн. Дараагийн улиралд нь Арсеналын хожил 64.9 хувьтай (Вэнгэрийн хувьд дээрээсээ хоёр дахь үзүүлэлт) байсан боловч түрүүлж чадсангүй. Түүнээс хойш хоёр ч удаа 60 буюу түүнээс дээш хувийн хожилтой байсан ч (2007-08, 2009-10) хоёуланд нь түрүү байхгүй. Уг нь бол 2007-08 улирлын хожлын хувь хос цомтой 1997-98 улирлынхаас ч сайн байсан шүү дээ.

Вэнгэрийн удирдсан бүх улиралд Арсенал 4 дүгээр байрнаас доор байрлаж байгаагүй. Одоогоор Франц эрийн удирдлага доор 17 улирал дараалан эхний дөрөвт улирлыг дуусгаж байгаа нь клубын хувьд дээд амжилт. Өмнө нь 1930-31 улирлаас 1934-35 улирлын хооронд 5 улирал дараалан энэ амжилтыг үзүүлж байсан.

Арсеналын эхний дөрөвт багтаж улирлыг дуусгасан нийт улирлуудын 42.5 нь Вэнгэрийн удирдлага доор байжээ.

Энэхүү тогтвортой амжилт нь хуучин цэнгэлдэх Хайбери болон одоогийн Эмирэйтс цэнгэлдэх дэх үзүүлэлтийг харьцуулахад тод харагдана. Арсенал шинэ цэнгэлдэхдээ нүүж орсноосоо хойш цом хожоогүй ч гэсэн энэ үзүүлэлт нь өмнөх цэнгэлдэхэд хийсэн Вэнгэрийн үзүүлэлттэй ихээхэн төстэй байгаа юм.

Хайбери дэх хожлын хувь 70.6 байсан бол Эмирэйтсийнх 68.2 байна. Харин тоглолт бүрд оруулсан гоолын хувьд яг адилхан (Эмиртэйтст 2.16, Хайберид бас 2.16) боловч шинэ гэртээ хавьгүй багыг алдсан (Эмирэйтст 0.77, Хайберид 0.82).

Энэ 17 жилийн турш Вэнгэр 187 тоглогчийг тоглуулсан нь Арсеналын үндсэн багт гарч тоглосон нийт тоглогчдын 22.9 хувийг бүрдүүлж байна. Патрик Виейра менежерийн төлөө хамгийн олон тоглолт (402 тоглолт, нийт тоглолтын 41.7 хувь) тоглосон бол Вэнгэрийг ирэхэд байсан тоглогчдоос Деннис Бергкамп хамгийн олон (376 тоглолт) тоглосон.

Түүний төлөө хамгийн олон тоглосон 10 тоглогч нарын дунд одоогийн бүрэлдэхүүнээс ганц Тео Валкотт л байгаа бөгөөд мань эр одоогоор 270 тоглолт хийчихээд байна.

Эдгээр 187 тоглогчдоос ердөө 27 нь л менежерийн төлөө ганц тоглосон бол 22 тоглогч 200 болон түүнээс дээш тогложээ.

Хамгийн олон тоглосон 10 тоглогч

Вэнгэрийн удирдлага доор Арсеналд тоглож байсан тоглогчдын талаас илүү нь (96) гоол хийжээ. Энэ хугацааны хамгийн олон гоолтой тоглогч нь мэдээж Клубын хамгийн олон гоолтой Тиерри Анри байна. Вэнгэрийн үед орсон нийт 1786 гоолны 228 нь түүний нэр дээр бүртгэлтэй ба 12.8 хувийг дангаара эзэлж байна. Хамгийн олон гоолтой 10 тоглогчдын маань гоолууд нийт гоолын 48.3 хувийг эзэлж байгаа юм.

Хамгийн олон гоолтой 10 тоглогч

Яг өнөөдөр Английн лигт ажиллаж байгаа 91 менежерээс хамгийн удаан ажиллаж байгаа нь Арсэн Вэнгэр. Хоёрдугаарт жагсаж байгаа Эксэтэр Ситигийн Пол Тисдэйлын хугацааг хоёр нугалсанаас илүү удаан байгаа. Энэ жагсаалтад өөр хэн ч тасралтгүй 5 жилээс дээш ажиллаагүй байгаа. Долоо нь буюу найман хувь нь тус тусын клубт гурван жилээс илүү хугацаагаар ажилласан.

Премьер лигийн хувьд Алан Пардью хамгийн удаан ажиллаж байгаа хоёр дахь хүн болж таарч байгаа юм. Түүний ажилласан хугацаа бараг гурван жил. Хоёроос дээш жилээр клубтээ ажиллаж байгаа менежерүүд гэвэл Сэм Аллардайс (Вэстхам), Мартин Ёол (Фулэм), Малки Макай (Кардифф Сити).

Бантагнасан: Цогоо
Эх сурвалж: Арсенал цэг ком

ТОМАШ РОСИЦКИ: “АМЬДРАЛДАА ХЭЗЭЭ Ч ОДООГИЙНХ ШИГ ИНГЭЖ ИХ ЦАНГАЖ БАЙГААГҮЙ”

Өнгөрсөн улирлын эхний 30 тоглолтын алийг нь ч гараанаас эхлүүлээгүй гэхэд Томаш Росицки клубыг дөрөвдүгээр байр эзлэхэд чухал үүрэг гүйцэтгэсэн. Тунчиг эгзэгтэй үед формондоо орж Чех хагас хамгаалагч маань Буучдыг 16 дахиа дараалан Аваргуудын лигт шалгарахад туслав.

Вэст Бромвич Албионыг 2-1ээр хожиход хийсэн хоёр гоол, Эмирэйтс Цэнгэлдэхэд Манчестер Юнайтедтай 1-1ээр тэнцэхэд Тео Валкотод өгсөн дамжуулалт нь Арсеналыг нөгөө алдартай 4-р байрыг эзлэхэд гол түлхэцийг үзүүлсэн.

Одоо 32 настай залуу эр Буучдын найман жилийн цомын ганг тайлахаар хэзээ хэзээнийхээс илүү цангаж байна.

Ердөө энгийн. Миний зорилго бол цом. Би лигт түрүүлмээр байна. Би энэ клубт ирээд найман жил болж байна. Энэний төлөө ирсэн, одоо цаг нь болсон. Мэдээж их хэцүү тэмцээн. Английн лигт өөр олон хүчтэй багууд байгаа нь тодорхой. Тэгэхдээ надад бусад хүмүүсийн юу гэх сонин биш байна. Зорилгодоо хүрэхийн тулд өөрийн чадах бүхнийг хийнэ. Бэлтгэл дээр өдөр бүр хамгаа гаргаж өөрийн мөрөөдөлдөө хүрэхийг чармайна. Карьерынхаа турш одоогийнх шигээ ингэж их цангаж үзээгүй.

Манчестер Юнайтед, Манчестер Сити, Челси зэрэг багууд менежерээ сольсоныг далимдуулах хэрэгтэй хэмээн Томаш үзэж байна. Мөн түүнээс гадна гол тоглогч нараа хадгалж үлдэж чадсан нь Умард Лондонгийн клубын хувьд тогтвортой байдлаа хадгалж, тайтлын төлөө зүтгэхэд нь том нэмэр болно гэж хэлж байна.

Өнгөрсөн жилийнхтэй адилхан Манчестер Юнайтед, Манчестер Сити, тэгээд Челси байх болно. Жил болгон л адилхан. Манайх менежерээ хэвээр нь үлдээсэн нь бага хэмжээний давуу тал болж болох юм. Эдгээр клубуудын менежерүүд нь дасах гэж хэсэг хугацаа авч магадгүй. Тоглогч нартаа өөрийн санаагаа ойлгуулж, өөрийн хүссэнээрээ тоглуулж эхэлтэл хугацаа зарцуулж магадгүй. Манчестер Юнайтедын хувьд амжилт олохын тулд тэгтлээ их өөрчлөлт хийх хэрэггүй байж магадгүй юм. Гэхдээ мэдээж өөрчлөлт бол өөрчлөлт. Юу болохыг хэн ч мэдэхгүй. Өөрчлөлт бүр хэцүү байдаг, бид тогтвортой байдлаа хадгалсан нь их тус болох байх гэж бодож байна.

Миний Арсеналд тоглож байх хугацаанд зуны наймаагаар хүнээ алдаагүй анхны тохиолдол болж байна. Том тоглогч явуулаагүй нь бидний хувьд их том давуу тал. Багийн ойлголцол, дотоод уур амьсгал маш чухал, бидэнд одоогоор энэ сайн байгаа. Өнгөрсөн улирлын төгсгөл рүү багийнхан нэгнийхээ төлөө үнэхээр тэмцэж байсныг харсан байх. Манай багийн хамгийн авууштай нь тэр байна даа.

Росицки Арсеналд 2006 онд ирэхдээ Чехийн лигийн аварга, Бундеслигийн аварга гэсэн гуншинтай байсан. Харамсалтай Эмирэйтс цэнгэлдэхэд ирснээсээ хойш хэд хэдэн хүнд гэмтэлд өртсөн, ялангуяа 2008 оны 2-р сараас 2009 оны 9-р сар хүртэл 18 сарын турш гэмтлийн улмаас тоглож чадаагүй юм. Плэймэкер маань өнгөрсөн улирлыг ч бас гэмтэлтэй эхлүүлсэн боловч гэмтлээ эдгээснийхээ дараа улаан цагаан өмсгөлтнүүдийнхээ дунд харах нүдний баясгалан болж гялалзсаар улирлыг тун өндөрт үдэж билээ.

Өнгөрсөн улиралд миний өсгийндөө хийлгэсэн хагалгаа удаан эдгэж байсан учраас залуустай хамт улирлын өмнөх бэлтгэл хийж чадаагүй. Тэгэхдээ тэрний өмнөх жилд улирлын өмнөх бэлтгэлд бүтэн хамрагдсан. Тэгж чадах юм бол улирлын турш сайн тоглоход их хэрэг болдог. Ач холбогдол нь энэ л дээ.

Клубын олон залуу тоглогч нар энэ зуны Азийн аялалд явсан. Чуба Акпом, Сэрж Гнабри, Гедион Зелалем, Игнаси Микүэл гэх мэт. Росицкид тэдний тоглолт таалагдсан бөгөөд өөрсдийгөө сайжруулахад нь туслахдаа баяртай байх болно хэмээж байна.

Тэдний хувьд багийнхантайгаа аялалд хамт явна гэдэг үнэхээр их туршлага. Тэд ахмад туршлагатай тоглогч нараас маш их юм сурч авна. Авъяас бол хангалттай байгаа нь харагдаж байна. Одоо харин тэд яахаас их юм шалтгаална, хэр их махруу хичээх вэ гэдгээс нь. Миний харснаар тэд их сайн тоглож, амжилтанд хүрэхийг их эрмэлзэж байсан. Ааш зангийн хувьд ч тэд их сайн хөвгүүд, тэд их амжилттай байвал би тэдний өмнөөс баяртай байх болно. Дараагийн шатандаа амжилттай шилжээсэй гэж би хүсч байна.

Мэдээж ахмад тоглогчийн хувьд би өөрийн мэдэх, тэдний мэдэхгүй зүйлсийг хуваалцах, заахыг хичээдэг. Өөрийн чадах боломжоороо тэдэн туслахыг хичээдэг. Тэгээд үлдсэн нь тэднээс өөрсдөөс нь хамаарна. Залуу хөвгүүд үнэхээр авъяастай тоглогч нар. Өмнө нь урт зам хүлээж байгаа ч гэсэн авъяастай нь хараажаар ил, өөрсдөө ч илүү ихийг сурахыг хүсч байгаа. Хамгийн чухал нь тэр шүү дээ.

Бантагнасан: Цогоо
Эх сурвалж: Арсенал цэг ком

МЭСҮТ ӨЗИЛ: АРСЕНАЛД ӨГСӨН АНХНЫ ЯРИЛЦЛАГА

Мэсүт Өзилийн Арсенал Плэйер буланд өгсөн анхны ярилцлагыг та бүхэнд хүргэж байна.

Арсеналд тавтай морил, Мэсүт. Манай Клубт элсэхэд хэр санагдаж байна? 
Их сайхан байна аа. Энд надад тулгарах шинэ дуудлагуудыг би алгаа дэлгэн угтаж байна. Лондонгийн амьдрал, шинэ багийнхан, менежер, фэнүүд, тэгээд Премьер лигийг ч гэсэн. Миний сэтгэл үнэхээр хөдөлж байна. Миний хувьд төгс шийдвэр болсон одоо үр дүнг нь харах л үлдлээ.

Чухам Арсеналыг сонгоход юу нөлөөлөв? Арсэн Вэнгэр шийдвэрт чинь хэрхэн нөлөөлөв? 
Арсенал Английн том клубуудын нэг учраас сонгосон. Менежер ч дэлхийн зиндааны хүн – тэрнийгээ олон жил харуулсан. Маш олон тоглогч нар түүний удирдлагын дагуу өөрсдийгөө хөгжүүлж чадсан нь миний Арсеналыг сонгосон шалтгаан байсан. Би өөрийгөө улам хөгжүүлмээр байна, бас би тоглолтын арга барилыг мэдрэхийг хүсч байна. Ур чадвартай, довтолгоо зонхилсон тоглолт үзүүлдэгээрээ Арсенал алдартай. Би үүнд яг сайхан зохицно гэж бодож байна. Ийм ч учраас энэ клубт нэгдсэн.

Клубын амбиц, төлөвлөгөө таны шийдвэрт хэр нөлөө үзүүлсэн бэ? 
Үнэхээр чухал нөлөөтэй. Хамгийн чухал зүйл юу байсан бэ гэхээр менежер надад итгэл үзүүлж байгаа. Өөрийн чадварыг харуулж, талбай дээр зугаацахыг би хүсч байна. Би өөрийн тоглолтоороо багийнхандаа тус болж чадна гэж бодож байна.

Клубт нэгдэхийн өмнө Пэр Мэртезакер, Лукас Подолски нартай зөвлөлдөв үү? 
Харамсалтай нь чадаагүй ээ. Хамаг юм их хурдан болоод өнгөрсөн. Менежертэй утсаар их удаан ярихад тэр өөрийн алсын хараа, миний тухай юу гэж бодож байгаа тухайгаа тодорхой ярьсан л даа. Тэр яриа нь намайг ятгаж дөнгөсөн учраас би одоо Арсеналд байна.

Арсеналын тоглолтын хэв маягийн тухай. Танд хэр таалагдаж байгаа вэ? 
Өмнө хэлсэнчлэн Арсенал бол ур чадварын хувьд дэлхийн хамгийн шилдгүүдийн нэг. Менежер үргэлж гоё, довтолгоотой тоглолт үзүүлэхийг хичээдэг. Би энд их зохицно гэж бодож байна, яагаад гэвэл би түргэн, нэгийн хүрэлтээр тоглох дуртай. Клубын нэг хэсэг болж багтаа туслана гэдэг надад таалагдаж байна.

Баг маань энэ жил цом авна гэдэгт хэр итгэлтэй байна? 
Мэдээж авна. Сүүлийн хэдэн жил Арсенал төдийлөн амжилт гаргаж чадахгүй байсан. Улам амжилттай баймаар байна. Цом хожмоор байна. Фэнүүд ч гэсэн тэгж хүсч байгаа гэж бодож байна. Маш хүчтэй бөгөөд залуу бүрэлдэхүүн маань менежерийн удирдлагын дагуу зөндөө их өсөж дэвжих байх. Бидэнд чадвар байгаа учраас цом хожиж чадах болно гэж би бодож байна. 

Өнгөрсөн таван жилийн турш та Европт хэнээс ч илүү олон гоолын боломжийг нээлттэй тоглолтоос үүсгэсэн байдаг. Та гоолын дамжуулалтыг гоолтой адилхан гэж үздэг үү? 
Тийм ээ, мэдээж. Гоолын дамжуулалтууд амжилтыг дагуулдаг, би тийм боломж үүсгэх дуртай тоглогч. Багийнхан маань намайг тийм ч амиа бодсон тоглогч биш гэдгийг мэдэх байх. Би гоолын дамжуулалт өгөх эсвэл өөрөө гоолдохдоо маш их баярладаг. Хамгийн гол нь баг маань зорилгодоо хүрч, эерэг хөлбөмбөг тоглох шүү дээ.

Премьер лиг Ла Лигээс өөр хэв маягтай. Та хэрхэн дасан зохицож, өөрийнхөө тоглолтод ямар шинж чанар нэмнэ гэж бодож байгаа вэ? 
Би энэ лигт тоглох гэж байгаадаа их баяртай байна. Хүн болгон Премьер Лигийн хамгийн хүчтэй лиг гэж мэднэ. Үнэхээр олон шилдэг багуудтай. Би өөрийгөө энд батламаар байна. миний хувьд шинэ дуудлага, шинэ даалгавар. Би тэсэн ядан хүлээж байна. Боссын удирдлага доор багтайгаа цуг сайжирмаар байна. Миний сэтгэл их хөдөлж байна. Бага байх үеэ эргэн саная.

Торны хөлбөмбөг (affenkafig – cage football) таны ур чадварт их нөлөө үзүүлсэн гэж ярьцгаадаг. Яагаад гэдгийг хэлж өгөхгүй юу?
Талбай их жижигхэн байсан. Ихэнхдээ би өөрөөсөө тав, зургаан насаар ах хүүхдүүдтэй тоглодог байсан. Тэгэхэд бас тийм ч өндөр биш байлаа. Өөрөөсөө ахмад, биерхүү хүмүүсийн эсрэг их зогсох шаардлагатай болдог. Талбай их жижигхэн учраас булангийн цохилт гэж байхгүй тоглолт байнга үргэлжилчихдэг байсан. Энэ миний амьдралд их хэрэг болсон шүү. Миний ур чадвар сайн гэдгийг та бүхэн харцгаасан биз дээ.

Хөлбөмбөгөөр зугаа цэнгэл хийж байх үедээ өөрийгөө хэнтэй зүйрлэж бодох дуртай байсан бэ? 
Саяхан би Зинедин Зиданыг шүтдэг тухайгаа хэлсэн. Миний хувьд тэр төгс тоглогч. Агаарт сайн. Хамгаалалтад сайн тусладаг, довтолгоондоо сайн. Миний шүтээн байсан. Сонин хэвлэлд ч муугаар хэлэгддэггүй, хувийн амьдралын талаар ч тэр. Миний хувьд ёстой даган дуурайх ёстой хүн. Тиймээс би өөрийгөө Зинедин Зидан гэж боддог байсан даа.

Английн ард түмний хувьд анх 2009 оны УЕФА Андер-21 аварга дээр Германууд Английг 4-0оор хожиход гол үүрэг гүйцэтгэж анхааралд нь өртсөн. Тэр багт Тео Валкотт, Киеран Гиббс нар байсан. Тэр тоглолтыг санаж байна уу? 
Ямар ч байсан их сайхан үе байсаан. Бид Андер-21 Европын Аваргад түрүүлсэн. Тэр баг маань үнэхээр класс баг байсан. Үнэхээр сайн тоглогч нараас бүрдсэн, удирдлагад маань Хорст Хрубеш, Диетар Эйлц зэрэг дасгалжуулагч нар. Үнэхээр гоё үе байсан. Тэр тоглолтод ёстой илүүрхсэн. Өөрсдийн боломжийг ч гүйцэт гаргаж тийм харьцаагаар ялах нь ч шударга байсан. Миний хувьд ч сайхан туршлага болсон.

Хувь хүний хувьд Лондон шиг хотод ирэх хэр санагдаж байна? 
Би их боддог. Лондон хотын тухай их олон сайн зүйлсийг сонсож байсан. Энэ бол “Дэлхийн хот” учраас их олон зүйл болдог байх. Маш олон зүйлсийг хийж болно. Би энэ хотыг харахыг их хүсч байгаа. Тэгэхдээ гол нь тэнд ажиллана гэдэг нь чухал шүү дээ.

Арсеналын фэнүүдэд хандаж юу хэлэх вэ? 
Арсеналд тоглох гэж байгаадаа би их баярлаж байна. Миний хувьд нэр төрийн хэрэг. Бид хамтдаа амжилттай улирлыг үдэх байх гэж найдаж байна.

Бантагнасан: Цогоо
Эх сурвалж: Арсенал цэг ком

'ӨЗИЛ АРАЙ ДЭНДҮҮ АВЪЯАСТАЙ'

Өнгөрсөн мягмар гаригт Арсенал Германы шигшээгийн тоглогч Мэсүт Өзилийг багтаа элсүүлсэн билээ. 24 настай тоглогчийн ур чадварын тухай илүү дэлгэрэнгүй мэдэхийн тулд Германы хөлбөмбөгийн мэргэжилтэйн Рафаэл Хонигстейнтэй уулзаж мэдээлэл авав. Тухлан сууж, таалан соёрхоно уу: 

Энэ их том наймаа болсон. Яагаад гэвэл Өзил яг одоо оргил үе рүүгээ орж байгаа учраас өөрийнхөө хамгийн чухал үеүдийг Арсеналд өнгөрөөх нь зүйн хэрэг. Тэгээд бас Дэлхийн Аваргын өмнөх жил болж байгаа учраас бүүр ч чухал. Германчууд энэ талаар их ам сайтай байгаа. Яагаад гэвэл Арсенал клубээсээ авахуулаад менежерээ хүртэл яг л Өзилийн хамгийн сайн чадварыг уутлан гаргаж ирж чадах газар болохоор тэр. Уран мэдрэмжтэй, бүтээлч тоглогчдын адил түүний тоглолт менежерийн бүрэн итгэлийн үрээр гарч ирдэг. 

Рафаэл Хонигстейн: "Тэрээр 2010 оноос хойш л Германы төлөө гайхалтай тоглолт үзүүлсээр байгаа. Багийн тоглолтыг явуулж байгаа хүн нь. Ямар ч гэсэн довтолгоон дээр."

Сид Лөүи байх нэг удаа хэлж байсан юм. “Мэсүт Өзил өөрийгөө хэр сайн гэдгээ ч мэддэггүй байх” гэж. Энэ үнэн байж магадгүй юм. Тэр итгэмээргүй зүйлсийг хийж чаддаг бөгөөд тэрнийг нь харж байхдаа энэнээс илүү сайн хийж чадах байх даа гэсэн бодлыг төрүүлдэг. Бүр арай дэндүү авъяастай мөртлөө заримдаа тоглолтыг өөрийн боломжоороо удирдаж чаддаггүй. Тэрээр Германы төлөө 2010 оноос хойш гайхалтай тоглолт үзүүлсээр байгаа. Олон сайн тоглогч нартай боловч Мэсүтийн нэр хамгийн түрүүнд бичигддэг. Багийнхаа тоглолтыг явуулж байгаа хүн нь. Ямар ч гэсэн довтолгооны хувьд. 

Вэнгэрийн гэж хэлэгдэж болох наймааны шинж чанарыг төгс агуулсан. Ур чадварын хувьд арай дэндүү авъяастай, нэгийн хүрэлтээр тоглох маш их дуртай. Хүмүүсийн шүүмжилдэг нэг зүйл юу вэ гэвэл, түүнийг цөөхөн гоол хийж байна гэдэг. Германы төлөө мөн адил, гоё байрлалд байнга ордог ч хангалттай хүчтэй байж чаддаггүй. Сайн дасгалжуулагч, зөв хүмүүстэйгээ тоглох юм бол энэ тал дээр дорхноо сайжрах биз. Нас нь ч тийм хөгшин биш. Хүмүүст танигдаад удаж байгаа гэхэд ид үедээ ч ороогүй шүү дээ. Тэр бол ямар ч багт очсон улам сайн болгож чадах хүн, мэдээж Арсеналыг ч гэсэн сайжруулна. 

Арсеналын тоглолтын арга барил бага зэрэг өөрчлөгдөх хэрэгтэй. Бүгдээрээ 10 дугаарт тоглоод байж болохгүй шүү дээ. Өзилийн хамгийн сайн тоглолт довтлогчийн ард тоглоход гардаг гэж би бодож байгаа, ингэснээр тэр байнга хойш, урагш гүйгээд байхгүй болж өөрийн сайн тоглолтоо гаргах боломжтой болдог. Үнэхээрийн суут санаа гаргахын тулд түүнд цаг хугацаа, орон зай хэрэгтэй. 

Рафаэл Хонигстейн: "Ур чадварын хувьд арай дэндүү авъяастай, нэгийн хүрэлтээр тоглох маш их дуртай. Тэр бол ямар ч багт очсон улам сайн болгож чадах хүн, мэдээж Арсеналыг ч гэсэн сайжруулна."

Баруун, зүүн жигүүрт одоогийн Кацорлагийн тоглож байгаа шиг байрлалд плэймэкерээр тоглож байсан. Арсэн Вэнгэр төвийн плэймэкерүүдийг жигүүрт тоглуулж сургадаг туршлагатай. Өзил тэр байрлалууд дээр тоглож чадах нь тодорхой боловч жигүүрээр голлон тоглолт явдаг Премьер лигийн хувьд түүнийг жинхэнэ 10 дугаарт тогловол зохимжтой байх гэж би үзэж байна. 

Арсеналчууд бөмбөг эзэмшиж тоглодогоороо алдартай. Өзил тэр тал дээр маш сайн. Премьер лигт гайгүй хурдан идээших байх. Ширүүн тоглолт, таклуудад ямар байдлаар хариу барих нь вэ гэдгийг нь харах л хэрэгтэй байх. Сүүлийн хэдэн жилд их юм сурсан учраас энд ч гэсэн дасан зохицохдоо хурдан байх болов уу. Хүнийхээ хувьд ч гэсэн их хэрсүү хүн шүү дээ. 

Бантагнасан: Цогоо 

Эх сурвалж: Арсенал цэг ком

Мэсүт Өзил: Арсеналын шинэ тоглогч бол “үзэсгэлэнтэй боловч эмзэг цэцэг”

Бернабэу цэнгэлдэхэд цоо шинэхэн галактико болсон Гарэт Бэйлийн танилцуулга дээр ирсэн Реал Мадридын 20 мянган фэн ганц түүний нэрийг дуудаад зогссонгүй. “Өзилийг бүү зараач” гэсэн үгс алдарт цэнгэлдэхийг дүүргэн цуурайтаж байсан нь клубын ерөнхийлөгч Флорентино Перезд таагүй байгаа нь илт харагдаж байсан юм.

Хэдэн цагийн дараа Мэсүт Өзил Арсенал руу 42,4 сая паундаар зарагдлаа гэсэн мэдээлэл баталгаажихад гашуудал жинхэнээсээ урсаж эхэллээ.

Реалын од Кристиано Роналдо Герман тоглогчийг явсанд “уурлаж” байгаа тухайгаа ярьсан бол хамгаалагч Серхио Рамос багийн андынхаа Реалд хамгийн сүүлд тоглохдоо өмсөж байсан өмсгөлийг барьсан зургаа твиттерт тавьж, “ассистын хаан”-д гашуудаж байгаагаа зарлажээ. Реалын фэнүүдийн дунд Испанийн АС сэтгүүлээс явуулсан санал асуулгад 66 хувь эсэргүүцсэн санал өгч.

Тэдний гутарч байгааг ойлгоход амархан. Одоо 24 настай Өзил сүүлийн 5 жилд Европын шилдэг 5 лигийн хэнээс нь ч илүү гоолын дамжуулалт өгч, боломж үүсгэсэн байдаг. 

Бэйлтэй шууд харьцуулсан хүснэгтээс харвал Өзил бараг бүх үзүүлэлтээрээ илүүрхэж байгаа юм. Реал арай илүү өндөр түвшинд тоглодог гэдгээр дамжуулалт болон үүсгэсэн боломжийг тайлбарлаж болох боловч Герман эр цохилтын оновч, дамжуулалт, хууралтаар хамаагүй өндөр чадвартай байгаа юм.

Испанийн хөлбөмбөгийн мэргэжилтэн Жон Карлин ярьж байна: Барселонагийн фэнүүдээс өрсөлдөгч нарынхаа ямар тоглогчийг багтаа авбал хамгийн хурдан дасан зохицож тэдний стилийн тоглолт үзүүлэх вэ гэж асуух болгонд бүгд Өзил гэж хариулдаг. Хөлбөмбөгийн хувьд тэр маш түргэн сэтгэдэг, тэгээд үнэхээрийн төгс ур чадвартай. Бусад тоглогч нараас хамаагүй түргэн үйлдэл хийдэг тоглогч нарын нэг. Үнэхээрийн чадварлаг бөмбөг тогтоолтоороо тэр талбайг ажиглаж гоолын дамжуулалт өгч болох зайг олж харах хугацааг өөртөө гаргаж чаддаг. 

Перез бол маш их маягтай хүн. Урлагийн бүтээл цуглуулагч түүний хувьд Пикассо, Далигийн бүх зурагнуудыг өглөө гэхэд нэмээд Мирошийн зургийг авахаар санаархаж мэдэх л хүн. Юм цуглуулахын донтой ч гэж хэлж болохоор. Иско зах дээр гарч ирэнгүүт Перез түүнийг авахаар санаархсан. Уг нь тэдэнд Искогийн хэрэг тийм ч их байгаагүй боловч Реал авахгүй бол өөр хэн нэгэн гарч ирээд авчихна гэдгийг мэдэж байсан учраас авсан. 

Нэгэнт Иског авчихсан учраас түүнийг тоглуулах ёстой гэсэн дарамт Анчилотти дээр ирсэн. Хажууд нь Өзил гэсэн эцсийн бүтээгдэхүүн байсаар байтал тэр шүү дээ. Тэгээд эд нар дээр Бэйл, Лука Модрич гэсэн нөхдийг нэмээд өгөхөөр бүүр асуудал үүснэ. Хэн нэгнийг явуулах хэрэгтэй болно оо доо. 

Тэр хэн нэгэн нь Түрк цагаачийн хүү, Гэлзэнкирхэнд “сармагчны тор” гэж гэгддэг хашаатай хайрган талбай дээр тоглож өссөн Өзил болж таарлаа. Шалкэгийн академиар хүмүүжин гарч ирсэн Өзил Вэрдэр Брэмэн рүү 19 настайдаа 2008 оны 1-р сард очоод Уефагийн цомын финалд хүрэхэд нь туслав.

Өзилийн шигшээгийн дасгалжуулагч Ёахим Лөв:

Реал Мадрид Өзилийг зарах шийдвэр гаргасан нь үнэхээр ойлгомжгүй зүйл.

Англичууд түүнийг анх 2009 оны Европын 21 наснаас доошх аваргын тэмцээнээр харсан. Тэрээр Английг 4-0оор нам цохисон Германы багийн гол тоглогч байлаа.

Тор-Кристиан Карлсэн (15 жил Европын клубуудэд скаут хийсэн): Өзил 17 настайгаасаа л хамаг скаутуудын сэтгэлийг хөдөлгөдөг байсан. Тэгэхдээ тэр тэмцээн түүний хувьд жинхэнэ тэсрэлт болсон л доо. Тэр үнэхээр гайхалтай байсан учраас хүмүүсийн санаанд тод үлдсэн. Түүнтэй тоглож байсан Германы хүүхдүүд үнэхээр тасарчихсан байсан бөгөөд бүгдээрээ л Шигшээ баг руугаа суга суга дэвшицгээсэн. 

Шигшээгийн хувьд ч гэсэн тэрээр дороо нэрд гарсан. 2010 оны Дэлхийн Аваргаар Английг 4-1, Аргентиныг 4-0 харьцаагаар устгахад гол тоглогч байсан нь түүнийг ФИФА-гийн бэлгэдлийн шигшээ, Реалын бүрэлдэхүүнд орох боломжийг олгожээ. Роналдод гоолын дамжуулалт өгч, Барсаг түлхэн аваргын суудалд Реалыг залахаас бусад үедээ Өзил даруухан, Мадридын оддын замналаас холуур амьдарч байлаа. Лалын шашинтай тэрээр тоглолт болгоны эхэнд Коран судраас эш татаж, Рамаданы үеэр аль болох боломжоороо мацаг барьдаг. 

Арсеналд түүнийг шигшээ багийн анд Пэр Мертезакер, Лукас Подолски хоёр, мөн түүнийг авахын тулд клубын рекорд үнэ санал болгосон Германаар ярьдаг менежер хүлээн авч байна. 

Өзил Арсэн Вэнгэрийн өөрт нь үзүүлж байгаа итгэл түүнийг наашаа ирэхэд хэрэг болсон гэж хэлсэн бол Карлины ярьж байгаагаар өөрийгөө хүнд хэрэгтэй гэж мэдрэхийг хүсч байгаа тоглогчид Эмирэйтс яг сайхан тохирох юм байна.

Түүнд эргэлзэх ганц зүйл гэвэл заримдаа тоглолтоос алга болчихдог. Тэр менежерээс их хайр мэдрэхийг хүсдэг. Тэр маш үзэсгэлэнтэй боловч хэврэг цэцэг шиг. Гэхдээ түүнийг их асарч тордох юм бол юуг ч хийж чадна. 

Өзилийн наймаанд шинэ багийнхан нь үнэхээр баяртай хандаж байна. Подолски, Санти Кацорла, Жак Вилшэр, Аарон Рамси нар багийнхаа шинэ гишүүний талаар баяртайгаар твитлэсэн бол клубын онлайн дэлгүүрт өмсгөлийн худалдаа энгийн үеийнхээс 12 дахин илүү эрчимжсэн байна.

Карлсен Өзилийг Лондончуудын хувьд гайхалтай сайн тохирох тоглогч гэж үзэж байгаа бөгөөд хэтэрхий их итгэл хүлээлгээд тоглогчийг дарамтанд оруулах вий хэмээн санаа зовж байна.

Өзилийн тоглолтыг тун тансаг нарийн, зөн билэг, бүтээлч гэсэн үгүүдээр тодорхойлно. Тиймээс Арсеналын хэв маяг бол түүний авъяас чадварт төгс тохирно. Тэгэхдээ түүнийг хэсэг харзнах хэрэгтэй. Яагаад гэвэл Английн хөлбөмбөг бол түүний мэддэгээс тэс ондоо. Тоглогч нар хамаагүй ширүүн, Испанид байдгаас бага зай гаргаж тоглоно. Энэ улиралд Премьер Лигт шинээр элссэн олон довтолгооны хагасууд байна. Челсигийн Виллиан, Ман Ситигийн Стеван Ёветич, Спурсын Эрик Ламела гэх мэт. Эдгээр тоглогч нараас илүү гэдгээ баталж чадах эсэхийг зөвхөн цаг хугацаа л харуулна. 

Мадридад түүнийг алдсандаа гашуудаж байна. Арсеналд бол аль хэдийн хайрлагдаад эхэлсэн. Өзилийн хувьд ч хийх ажил их байна даа.

Бантагнасан: Цогоо
Эх сурвалж: БиБиСи