Sunday, June 19, 2022

SHE’S THE ONE


Робби Виллиамсын тоглолтуудын бичлэгийг их үздэг байлаа. Ялангуяа энэ Нэбвортод болсон тоглолтын бараг бүх дууны бичлэгийг жагсаалтад хийж байгаад сонсож байсан юм. Энэ тоглолтын энэ дуунд их дуртай. Яадаг вэ гэхээр Робби үзэгчид дунд зогсож байгаа хосуудтай ярилцдаг юм. Тэр хоёр хүний тэр өдрийн үзвэрийг маш дурсамжтай болгож өгч байгаа нь их гоё санагддаг.

- Үзэгч та нар дунд өнөөдөр дурлачхаад явж байгаа хүн байна уу? Өө энэ доор байгаа та хоёр, та хоёр хэр удаа... ноёнтон та надтай бага зэрэг төстэй юм уу даа? Тийм ээ. Та их царайлаг хүн юм аа. Маш царайлаг. Та хоёр хэр удаан үерхэж байна даа?
- (Эмэгтэй нь хариу хэлж байна)
- (үзэгчдэд хандан) Гэрлээд арван жил болж байгаа гэнэ ээ. Наадах чинь миний хамгийн удаан үерхлээс бараг есөн жил гурван сараар илүү урт юм байна шүү. Та хоёр хүүхэдтэй юу? Хоёр хүүхэдтэй гэж үү? Хэдэн настай вэ? Аравтай, зургаатай. Одоо хаана байгаа юм? Маргааш зурагтаар та хоёрыг харах нь ээ. Эхнэрээ үнс дээ. Яг тэр, хайр яг энд байна. Баяр хүргэе та хоёрт. Гоё харагдаж байна. Энэ дууг та хоёрт зориулъя.
Гээд дуугаа дуулж эхэлдэг. Дуулах явцдаа эмэгтэйн нэрийг дуундаа оруулж дуулаад л. Тэгснээ дууны дундуур өмсөж байсан хүрмээ Кэйлид тайлж өгдөг. Нөгөөх нь бүр баярын нулимсаа барьж дийлэхгүй нөхрөө тэврээд уйлдаг. Гэхдээ хамгийн гоё нь энэ бичлэгийн доор коммэнт дунд нөхрийн бичсэн коммэнт байдаг. Гурван жилийн өмнө бичсэн: “We are still together and it’ll be 27 years married later this year , wouldn’t change a thing about that night so long ago now.” (Бид хоёр одоо ч хэвээрээ, энэ жил гэрлэсний 27 жилийн ой болно. Тэр шөнийн юуг ч өөрчлөхгүй. Их удаж дээ) гээд коммэнт. Одоо бол гэрлээд гучин жил болж байгаа байх нь.
Хүрмээ тайлж өгч байгаа хэсэг нь энэ бичлэгийн хамгийн их ухрааж харсан хэсэг байдаг юм байна. Яахав дараа нь Робби хүрмээ өөр хүрмээр сольж авдаг л даа. Гэхдээ л энэ хоёрын хувьд бол тэр орой мартагдашгүй байсан биз.
Бичлэгийн хаяг:



Saturday, June 11, 2022

Teenage Dirtbag

 Түрүүн ажил дээрээ ирчхээд юм хийнгээ ютүбээр ерээд оны альт хамтлагуудын дуу тавьчихсан сонсож суулаа. Wheatus хамтлагийн Teenage Dirtbag гээд дуу явж байна. Дууны гол баатар залуугийн крашилдаг охины найз залуу гэж нэг саахуу юмны тухай дүрсэлдэг хэсэг байдаг юм.

Найз залуу нь гэж нэг шодой шиг юм
Сургууль соёлоор буу шийдэм агсаад
гэх анзааны үгтэй. Тэгсэн чинь "He brings a gun to school" гэж дуулдаг хэсэг дээр нь "буу" гэдгийг нь дарчихсан байх юм. Тэгэхээр нь бодов. "За арга ч үгүй юм даа. Балай америкууд сургууль дээрээ автомат буу барьж ирээд шүршчихээд байгаа юм чинь" гэж, тэгснээ цааш үргэлжлүүлэн бодов "Нисванисын Сургууль нураасайг бол нэрнээс нь болоод шууд хориглох байж дээ".
Энэ хүртэл уншсан хүмүүст бэлэг болгож энэ дууг зориулъя.



Tuesday, May 10, 2022

ТЭРСҮҮД ДАЙЧИН

 ТЭРСҮҮД ДАЙЧИН

гээл нэг ийм дууг ойрноос сонсдог болоод байгаа. Өмнө нь эдний Европ бэхлэлт гээд дууг их сонсдог байсан болохоор энэ дуу ч хэмнэл чимээ нь гоё таарав. Дууг нь зүгээр оруулчих гэхээр аль нэг хэсгээс нь хальт бантагнахгүй бол болохгүй санагдаад дахилтыг нь нэг иймэрхүү юу яалаа. Ами бидрохи гэдэг нь бенгали хэлээр "би тэрслэгч" гэсэн утгатай үг юм байна.
***
Ami bidrohi!
Тэрсүүд дайчин билээ би, ганцаар босно
Тэргүүн гудайлгүй сөрөн тэмцэнэ
Талхинд зовсон олны хайлах дуун
Тэнгэрт хүрэхээ болих хүртэл
Тарамдах дарангуйлагчийн цавчих дуун
Тулааны талбарт аниргүйтэх хүртэл
Түрлэг уухайг минь сонсохтун!
Ami Bidrohi!
Ami Bidrohi!
***
Ami bidrohi!
I am the Rebel Warrior
I have risen alone
With my head held high
I will only rest when the cries of the oppressed
No longer reach the sky
When the sound of the sword of the oppressor
No longer rings in battle
Hear my war cry!
***



Monday, May 09, 2022

Жаргалтай цагийн тухай Толкин гуай

 Жаргалтай цагийн тухай Толкин гуай ийн өгүүлжээ. Яг өөрөө сууж байгаад хэлсэн ч юм биш, зүгээр л Силмариллион туульс дээр саарал элф Синдаруудын тухай бичиж байхдаа л нэг иймэрхүү өгүүлбэр оруулсан төдий. Уг нь Бэлэриандын морикүэнди хаан Элү Тинголийн удирдлага дор цэцэглэн дэвжиж байсан Дориат хотын тухай боловч амьдралын ямар ч тохиолыг хэлж болууштай санагдав.

- But of bliss and glad life there is little to be said, before it ends; as works fair and wonderful, while they still endure for eyes to see, are ever their own record, and only when they are in peril or broken for ever do they pass into song.
Монголчилвоос:
- Аа гэхдээ аз жаргалтай, амар тайван амьдралын тухайд дуусахаас нь өмнө ярих юмс бага, хийж ахуй үйл шударга ариун, үнэн бахдалтай нь харахад бүхний нүднээ ил тул бичиж тэмдэглэх нь илүүц агаад гагцхүү гамшигт нэрвэгдэж, гарцаагүй сүйрэл нүүрлэхүйеэ дуу болон үлдэх билээ.

Tuesday, May 03, 2022

Б.Занданхүү

 Б.Занданхүү | Яруу найрач

***
Мөрөөдөн дуулдаг байлаа
Мөрөөдөн уйлдаг байлаа
Мөнх бусын орчлонд...
/72-р тал/
***
Танил бүрхэг өвлийн өдөр
хэн ч над руу цас шидсэнгүй
Хацар норгоод газарт бутрах
тийм л энхрийллийг би хүссэн
Хавар цагийн зөөлөн гуниг
дотоод сэтгэлд минь өлгийтэй хэвээр
Хариг цаг тооллын гүнд булшлагднам
Цасан шуурга исгэрнэ
Өө, одоо надад инээмсэглэл зохихгүй
цас шидэх хэрэггүй
Өсөж торнисон гэрийн дулаан
миний улиралд хайрагдчихсан
Өвөл минь би чиний цас.
Хунгарласан гунигийг минь хөлдөө
Өөдөөс нь алхаж исгэрэх дуунд чинь
шууръя, цагаахан даль цэцэг шиг
хүсэл алга болжээ.
/16-р тал/
***
Гэмшил хожимдож
Гадаа шуурга эхэллээ
Гэрлийн шил хагарах дуулдана
Сэтгэл бас харанхуйлчихлаа
Улигт шуургыг би хүсээгүй
Урам итгэл минь алдраагүй
Харин тэгтэл хувь заяа
Хатуу гартаа ташуур барьжээ
Гэсгээгдэгсэд энэлэн шаналтугай
Гэм нүглийг бурхан өгсөн
Хөлчүү дээдсийн шагнал болгосон
Хундага дарс энэ байна
Хөнтөрч орхиод бүхнийг мартъя
Хувь заяа минь илдээ далай.
2000 он
/23-р тал/
***
Миний улиралд дасаагүй
Харийн хүний араас
Намар шиг ширтэх
Надад сайхан байгаагүй
Цас бороо шиг аашиндаа
Үнэнч оршдогийн төлөө
Цагийн цагт дандаа
Шаналж дурладгийн төлөө
Шувууд ниссэн оддог
Өвс навч хагдардаг
Шунал тачаал л үлддэг
Өө, миний улирал, миний л...
***
Гэлмэгт шөнийн дальдчаа лаа
Гэрлээ дуусгаад бөхсөн байнам
Гэнэтхэн итгэл минь дэргэд нь урсаад
Гэмшил мэт царцсан байнам
Өө, би улаахан модтой дурлам холхид
Өвлийн бодлоор дулаацах л байсан
Гэрэлгүй лааны альхан булангаас
Гэртээ харихаа ч мэдэж л байсан
Санаа минь гил хархан торгомсог намиатах
Саарал ертөнцийн буйдад тийм дотносог харь
Инээмсэглэл минь зам заах
Идэрхэг хүсэл нь чулуун бие...
/39-р тал/
***
"Цадсаны дараах хоолны таваг шиг"
Царайлаг охидын өмнө
Гараа хумиж элгээ тэврээд
Гайхалтай сайхан бохь мөрөөднөм
Гоо сайхан гэдэг ёс байхаа больсон
Гомдолтой энэ цаг үед
Ренбрандтын сэтгэлийн гэгээт ертөнцөд
Эмсгий охин зорчих боллоо.
/41-р тал/
***
Үүр цайх нь үхэл амсхийх шиг...
/44-р тал/
***
Зөөлөн цагаан цасанд
Нүүрээ шургуулж мэгшлээ
Зөрөөд төөрөөд хаачих вэ дээ
Энэ л уйтхан орчлонд
/47-р тал/
***
Олон хундага дарсыг эгнүүлж өрөөд
Охидын төлөө өөрийнхөө төлөө согтмоор байна
Он цаг, шаналан гуниг юу юм бэ?
Огторгуй цэнхэрхэн байхад амьд байх сайхан
Цэнгэлтэй өдрүүдийн хань нөхөд минь
Цэвэрхэн дурсамжаа өвөртлөөрэй
Дараа өдөр дахин уулзахгүй, хичнээн сайхан
Давхар хуудастай номынхоо завсарт үлдэцгээе
Хайрлах гэж л би амьд яваа шүү
Хамгийн олон ерөөл дэвшүүлж хундага тулгая
Олон олон хундага дарсыг ганцхан удаа
Охидын төлөө, өөрийнхөө төлөө...
2001.06.10 Улаанбаатр
/64-р тал/
"Бурхангүй газар" | шүлгийн түүвэр